Moldovaya yaamurlar etişmeyincä biz televizorlardan siiredärdik nicä Evropa devletleri biri-biri ardı su altına kalardılar. Oradar büüktü, insan kurbannarı da oldu. Moldova umut edärdi, ani bu yaamurlar burayı etişmeyecek. Ama ölä olmadı.

Bir aydan zeedä durmamyca yaamurlar yaayêr: göklerdän sansın bakırdan döker. Nistru deresindä sular üüseldi, ama derä taşmadı, nicä olduydu 2008-ci yılda. Bu kerä ük Prut deresinä geldi. Derä taştı da onun suları kapladılar Nemţen, Kotul Moriy, Obileni, Sêrêteni küülerini. Sora su altına Ţıgankanın hem Stoyanovkanın birkaç evi kaldı. Sırada Geltosu hem Goteştı küüleri. Prut boyunda bulunan başka küülär da suyun basma kertiindä bulunêrlar. Pruttan haberlär sansın fronttan gelerlär: küülülär, poliţiya hem asker gecä-gündüz tıynak düzeerlär. Yardım için Romıniyada speţialistlär geldilär.

Prut derenin suları büünkü günädän Moldovada bir insanı kurban aldılar, binä yakın ev yıktılar, bölgelerdä ev çorbacılıklarına, çiftçilää hem hayvancılaa büük zarar getirdilär. Büünkü günädän ekonomika zararı taa esaplanmadı.

Bu belaya düşän insannara yardım için, Moldova öndercileri danıştılar dünnä cümnesinä. Para hem mal yardımnarı artık gelmää başladılar. Bundabn kaarä açıldı maasuz bir banka esabı, nereyi vatandaşlardan bu günädän 16 milion leydän zeedä para yardımı geldi. Ama bu pek aaz. Çünkü eni bir küüyü (Kotul Moriy küüyü başka bir erdä erleşecek) düzmää deyni hem 1000 ev enidän yapmaa deyni 400 miliondan zeedä ley läzım. Bu para bücettä yok. Umut var, ani onu yabancı devletlär hem kuruluşlar vereceklär. Bu evlär Kasımın 14-dän läzım örtü altında olsunnar.

Yardımdan bir tarafta kalmadı Gagauziya da. Buradan insannara mal yardımı (ruba, iyecek, yorgan-döşek) yollanıldı. Sudan zarar görän aylelerin uşakları Gagauziya lagerlerinä dinnenmää alındı.

Foto "Panorama" gazetasindan.