Ceviz ayın 23-dän 25-nä kadar Türkmenistanın Daşoguz vilayetında, “Köroglu eposu hem Dogu edebiyatı” adlı milletlärarası bilim kongresi geçti. Orayı 20 devlettän  bilim adamnarı katıldılar. Onnarın arasında Moldova Bilimnär Akademiyasının Gagauz Etnologiya Bölüm Başkanı Doc. Dr. Lübov ÇİMPOEŞ vardı. Söz onda.

Bu önemli toplantıda 100-dän zeedä doklad okundu. 5 sekţiya çalışmasında dartışmalar, diskusiyalar, haber hem bilim paylaşmaları oldu. Oturumnarda açıklandı eni aaraştırmalar, eni bakışlar hem sonuçlar, karşılandı türlü süjetlär. Birinci oturum başkanı olarak, kongresä kaılannarı tanıştırdım gagauzların “Köroglu” dastanınnan da. Tanınmış katılımcılar Turkmenistandan, Uzbekistandan, Azerbaycandan, Pakistandan, Koreyadan, İspaniyadan, Kırgızistandan, Afganistandan, Armeniyadan, Bulgaristandan, Ukrainadan, Belorusiyadan, Moldovadan, Gruziyadan, İrandan, Tacikistandan h.b. devletlerdän urguladılar bu eposun önemliliini hem onun üüsek erini dünneyin kulturasında. “Köroglu”, “Kor-oglı”, “Gur-ugli”, “Gör-ogli”, “Köroglişvili” hem taa başka adlarda halk kahramannar üzä çıkarıldı. Bu epos 13 başka-başka etnik grupalarında bulunan halkta kullanılêr. Dünnä mirasının büük bir kultura zenginnii taa bir kerä kahramanın memleketindä üzä çıkarıldı.

Bilim adamnarı dartışmalarda kaldırdılar aktual soruşlar: ileri dooru eni çalışma konuları aaraştırılsın hem “Köroglu” eposunu taa geniş dünnedä tanıtmaa deyni yabanci  dillerä çevirmelär yapılsın.

Birliktä orta bir karar alındı: teklif etmää ÜNESKOya, ki “Köroglu” eposu, bir zengin evelki miras anıtı olarak, dünnä kulturasının zenginniklerinin sırasına koyulsun!!!

Bu kongresi hazırlayan Turkmenistan Milli Kultura merkezi ’’MİRAS’’ Daşoguz vilayetında evelki kutsal erleri bizä gösterdilär. Bir-iki günün içindä büük saygıylan başımızı iilttik büük bilim adamının, peetçinin Mahmıta Zamahşarının mezarında. Türkmenistanın en eski Izmıkşir kalenin içindä, Göroglu etrapında Ismamıt atanın mavzoleyinä girdik.
Turkmenistanın topraa-kumu pek sıcak, ama insannarın ürää taa da sıcak, onnar yalpak, açık üzlü, geniş ürekli hem musafir sevändirlär.

Turkmenistanda kulturaya, bilim hem üüretim bölümnerinä devlet hem prezident tarafından büük yardım veriler, gözäl, paralı programalar çalıştırılêr.

Görüp o Saray gibi muzeyleri, bibliotekaları, okulları, hem şaşêrsın hem sevinersin.

Bunnara bakıp, düşünersin, ki bu devlet kendi kuvedini kaybetmäz, çünkü herbir iş yapılêr halkına deyni, gençlerinä deyni. Bu halkın, bu devletin ilerdä uzun hem geniş yolu var.

Doc. Dr. Lübov Çimpoeş,
Moldova Bilimnär Akademiyasının
Gagauz Etnologiya Bölüm Başkanı.